رســالة للجميع

السلام عليكم ورحمة الله وبركاتة 

نتمنى أن يكون الجميع بخير وصحة جيدة 

اعضاء كتير بعتت تسأل ليه الصفحة مخدتش موقف من الاحداث الحاصلة عن الفلم المسئ للرسول صلى الله عليه وسلم 

نحب نوضح للجميع اننا مش شايفين أى صفحة عملت أى شئ مفيد للموضوع ده لان كله بيتاجر بالأحداث لنشر الصفحات 

اللى عاوز يعمل حاجة فعلاً بدل ما ينزل صورة لمؤسسين الفيلم ويحط عليها شتيمة ويطلب من الناس يعملوا ليها مشاركة والعالم كلة يشوف صورة الناس اللى أساؤا للرسول على صفاحتنا وحسابتنا وننشر احنا الموضوع بطريقة هما لو قعدوا طول حياتهم مش هيعرفوا يعملوا للفيلم دعاية زى اللى حنا بنعملها على صفحات الفيس بوك ..

أبسط حاجة ممكن أى صفحة تعمها انها تنزل احاديث للرسول ونصايح من سنة الرسول صلى الله عليه وسلم هيكون افيد لينا كلنا 

وهنعرف العالم كله ان مهما حصل احنا متمسكين بدينا وبرسولنا وبسنتة 
رسولنا اللى فى يوم من الأيام راح سأل على جاره اللى ان متعود يآذيه كل يوم لمجرد انه مشافش منه اى آذية فى يوم معين راح زاره فى بيته 

رسولنا ولا دينا ولا أى دين أمرنا اننا نرد الإساءة بالإساءة 

وكتير حصلت قبل كدة ان اننا بجهل مننا نشرنا صفحات على الفيس بتسب فى الاسلام وفى الاديان كلها بحجة اننا نقفل الصفحات دى 

سؤال للجميع هل الصفحات دى اتقفلت بالعكس بتكبر وبتكبر وبتكبر يوم بعد يوم بدون ادنى مجهود من مسؤلينها 

لو حكمنا عقولنا شويه هنلاقى ألف رد ومليون طريقة نرد بيها على الاهانة لرسولنا عليه الصلاة والسلام 

أو أى رسول ربنا ارسله لاى أمة فالحمد لله احنا معترفين بكل الرسل واى اساءة لأى رسول لازم نرد عليها بالعقل واننا ننشر ثقافتنا عنه 

واحنا بإذن الله هنبدأ ننشر كل يوم  عن الرسول عليه الصلاة والسلام وعن سنتة 

أحسن ما ننزل صور ونقول شتيمة تساوى لايك وتهزيق يساوى كمنت ونستغل اعضاء بتثق فينا فى نشر الصفحة زى ما كتير قوى من الصفحات بتعمل 

أسفين طولنا على حضارتكم 

وفى انتظار رأيكم فى  موقفنا بالقبول أو الرفض احنا بنتقبل كل شئ بكل حب لانكوا اعيننا على اللى احنا بنعملة على  صفحتكم